မြန်မာပြဿနာ သံတမန်နည်းနဲ့ ဖြေရှင်းနိုင်ဖို့ ကုလ လုံခြုံရေးကောင်စီ အလှည့်ကျ ဥက္ကဌ တရုတ်သံအမတ်ကြီး ယုံကြည်

ကုလသမဂ္ဂလုံခြုံရေးကောင်စီမှာ မေလအတွက် အလှည့်ကျ ဥက္ကဌအဖြစ်တာဝန်ယူမယ့် ကုလသမဂ္ဂဆိုင်ရာ တရုတ်သံအမတ်ကြီး Zhang Jun က မြန်မာနိုင်ငံမှာ အခြေနေတွေ ခုထက်ပိုမဆိုးလာအောင် သံတမန်ရေးနည်းလမ်းတွေသုံးရှောင်ရှား နိုင်မယ်လို့ ယုံကြည်ကြောင်း ပြောပါတယ်။

“သံတမန်ရေး ကြိုးပမ်းမှုတွေနဲ့ အခြေနေတင်းမာမှုတွေ တိုးမလာအောင် ရှောင်ရှား နိုင်မယ်လို့ သူယုံကြည်ပါတယ်။ တကယ်လို့ အခြေနေ ပိုတင်းမာလာမယ်ဆိုရင် ထိပ်တိုက်ရင်ဆိုင်မှုတွေ ပိုဖြစ်လာပြီး အဲဒီလို ဖြစ်လာရင် အကြမ်းဖက်မှုတွေ ပိုတိုးလာနိုင်သလို ထိခိုက်သေဆုံးမှုတွေ ပိုများလာနိုင်တာကြောင့် မြန်မာနိုင်ငံတွင်း ဖရိုဖရဲ အခြေနေဖြစ်မယ့် လမ်းကြောင်းပေါ် ရောက်သွားနိုင်တဲ့ အပြင် ပြည်တွင်းစစ်ဖြစ်တဲ့ အခြေနေ ဆိုက်သွားနိုင်တယ်” လို့ ပြောသွားတာပါ။

အလှည့်ကျဥက္ကဌတာဝန်ယူချိန်မှာ လုပ်ဆောင်မယ့် လုပ်ငန်းတွေကို အလှည့်ကျဥက္ကဌ ဖြစ်လာတဲ့ နိုင်ငံက ချပြရတဲ့ထုံးတမ်းစဉ်လာ သတင်းစာရှင်းလင်းပွဲမှာ မြန်မာနိုင်ငံမှာ ပြည်တွင်းစစ်ဖြစ်လာဖို့ ရှိမရှိ သတင်းထောက်တွေက မေးမြန်းတာ အတွက် တရုတ်သံအမတ်ကြီးက ခုလို ပြောကြားလိုက်တာပါ။

အခုအချိန်မှာ မြန်မာနိုင်ငံဟာ ဒီမိုကရေစီ အသွင်ကူးပြောင်းတဲ့ကာလကို ပြန်သွားနိုင်သေးတဲ့ အချိန်ဖြစ်ကြောင်းလည်း ပြောပါတယ်။ ဒါ့အပြင် မြန်မာနိုင်ငံဟာ တိုင်းရင်းသားလူမျိုးစု အများအပြား ရှိတဲ့နိုင်ငံဖြစ်ပြီး ကိုင်ကွယ်မှုမှားရင် ပရမ်းပတာ ဖြစ်သွားနိုင်ကြောင်းနဲ့ တရုတ်အစိုးရကတော့ မြန်မာနိုင်ငံ နဂိုအခြေနေ ပြန်ရောက်စေမယ့် ဝန်းကျင်ဖြစ်လာအောင် နိုင်ငံရေးပါတီတွေကနေတဆင့် နိုင်ငံရေးအဖြေရှာနိုင်ရေး လုပ်ဖို့ဘက်ကပဲ ခိုင်ခိုင်မာမာ ရပ်တည်ကြောင်း ပြောပါတယ်။ တရုတ်အစိုးရဟာ သက်ဆိုင်ရာ အဖွဲ့အစည်းတွေနဲ့ အနီးကပ်လက်တွဲ ဆောင်ရွက်နေပြီး အကြမ်းဖက်မှု ၊ လူသေဆုံးမှုတွေ ရှောင်ပြီး ဆွေးနွေး အဖြေရှာဖို့ တိုက်တွန်းနေကြောင်းလည်း ပြောပါတယ်။

ဒါ့အပြင် အာဆီယံအဖွဲ့ကြီး အနေနဲ့ မြန်မာ့အရေး အဓိက ကဏ္ဍကနေ ပါဝင်သင့်တယ်လို့ တရုတ်အစိုးရက ရှုမြင်ကြောင်းလည်း ပြောပါတယ်။

“အာဆီယံဟာ မြန်မာရဲ့ အိမ်နီးချင်းနိုင်ငံတွေ အဖြစ်နဲ့ မြန်မာ့အခြေနေကို နားလည်သလို ဒီဒေသတွင်းအဖွဲ့တွေက ဒေသတွင်းပြဿနာကို ကိုင်ကွယ်ဖြေရှင်းရာမှာ အဓိက ကဏ္ဍကနေ ပါဝင်သင့်တယ်လို့ တရုတ်အစိုးရက ယုံကြည်ပါတယ်” လို့ ပြောသွားတာပါ။

အာဆီယံဟာ မြန်မာ့အခြေနေနေကို တကယ်နားလည်သလို အခြေခံအကျိုးစီးပွားချင်း လည်း တူညီမှုရှိနေတယ်လို့ ပြောပါတယ်။

ဒါ့အပြင် လက်ရှိမှာ မြန်မာနိ်ုင်ငံတွင်း လူသားချင်းစာနာမှု အခြေနေအတွက် အထူးစိုးရိမ်နေသလို ဒီ့ထက်ပိုဆိုးလာမှာကို မလိုလားတဲ့ အတွက် ဒါမျိုးဖြစ်မလာအောင် ကြိုးစား ရှောင်ကျဉ်ကြဖို့ လိုအပ်ကြောင်းလည်း ပြောပါတယ်။

လုံခြုံရေးကောင်စီမှာ ဧပြီလတုန်းက ဗီယက်နမ်က အလှည့်ကျ ဥက္ကဌ တာဝန်ယူခဲ့ချိန်မှာ အာဆီယံက မြန်မာ့အရေး အထူးအစည်းအဝေး တရပ်ကို အင်ဒိုနီးရှားနိုင်ငံ ဂျကာတာမှာ ကျင်းပခဲ့တ ဖြစ်ပြီး နိုင်ငံတွင်း အကြမ်းဖက်မှုတွေ ရပ်တံ့ရေး တောင်းဆိုတဲ့ သဘောတူညီချက် ချမှတ်နိုင်ခဲ့ပါတယ်။ ဒီအစည်းဝေးကို စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် တက်ရောက်ခဲ့ပေမယ့် စစ်တပ်နဲ့ ရဲက ဆန္ဒပြပြည်သူတွေကို အကြမ်းဖက်ပစ်ခတ်ဖြိုခွဲနေဆဲ ဖြစ်ပါတယ်။

 

Leave a Reply

Your email address will not be published. Required fields are marked *